هاوپەیمانیی هێزە سیاسییەکانی کوردستانی ئێران ئەمڕۆ چوارشەممە لە ڕاگەیەندراوێکدا، وێڕای شەرمەزارکردنی هێرشە درۆنییەکانی ئەمدواییەی ڕژێمی ئێران بۆ سەر هەرێمی کوردستان لە کاتی ئاگربەستدا، ئەو هێرشانەی وەک نیشانەیەک لە بنبەستی سیاسی و سەربازیی ئەو ڕژیمە ناو بردووە.
لە ڕاگەیەندراوەکەدا هاتووە: “ئەم پەلامارانە نەک نیشانەی هێز نین، بەڵکوو دەرخەری ئەو ڕاستییەن کە ڕژێم لە ئاست ئیرادەی گەلەکەمان و ئەو بنبەستە سیاسی و سەربازییەی تێی کەوتووە، تووشی شڵەژان و نائومێدی بووە.”
لە دوو ڕۆژی ڕابردوودا بەهۆی چەند هێرشی درۆنیی ڕژیمی ئیران بۆسەر کەمپ و بارەگاکانی حزبەکانی ڕۆژهەڵاتی کوردستان، پێشمەرگەیەکی ژن بە ناوی غەزاڵ مەولان شەهید بوو و چەند پێشمەرگەی دیکە بریندار بوون.
ڕاگەیەندراوەکە ئەم هێرشانەی بە پێشێلکردنی یاسا نێودەوڵەتییەکان ناو بردووە و داوای لە لایەنە نێودەوڵەتییەکان کردووە هەنگاوی کردەیی بۆ وەستاندنیان بگرنە بەر.
هاوپەیمانی جەختی کردۆتەوە کە خەباتیان بۆ بەدیهێنانی مافە نەتەوایەتییەکان بەردەوام دەبێت و هێرشەکان ناتوانن ئیرادەیان بشکێنن.
دەقی ڕاگەیەندراوەکە بەمشێوەیە:
“هێرش لە کاتی ئاگربەستدا، نیشانەی بنبەستی سیاسی و سەربازیی ڕژێمی ئێرانە
خەڵکی تێکۆشەری کوردستان!
ڕای گشتی و ناوەندە نێودەوڵەتییەکان!
کۆماری ئیسلامیی ئێران، جارێکی دیکە لە ڕێگەی هێرشی درۆنییەوە، سەروەریی خاکی هەرێمی کوردستانی پێشێل کرد و کامپی پەنابەرانی سیاسیی ڕۆژهەڵاتی کوردستانی بە ئامانج گرتەوە. ئەم هێرشانە کە لە کاتی ڕێککەوتنی ئاگربەستدا کران، جارێکی دیکەپەردەی لەسەر ناوەڕۆکی ڕاستەقینەی ڕژێمێک لادا کە هیچ کات بڕوای بە ئاشتی و چارەسەری سیاسی نەبووە و سەرکوت، زەبروزەنگ و تیرۆر کۆڵەکەی سەرەکیی مانەوەیەتی. ئەم پەلامارانە نەک نیشانەی هێز نین، بەڵکوو دەرخەری ئەو ڕاستییەن کە ڕژێم لە ئاست ئیرادەی گەلەکەمان و ئەو بنبەستە سیاسی و سەربازییەی کەوتووە، تووشی شڵەژان و نائومێدی بووە.
بەداخەوە، لە نوێترین شەپۆلی ئەم هێرشانە بۆ سەر کامپەکانی “ئازادی”ـی حزبی دیموکرات و “سوورداش”ـی کۆمەڵەی زەحمەتکێشان، دوو پێشمەرگە بریندار بوون و “غەزاڵ مولان”، کچە پێشمەرگەی کۆمەڵەی زەحمەتکێشان، شەهید بوو.
هاوپەیمانیی کوردستانی ئێران ڕادەگەیەنێت کە بە ئامانجگرتنی شوێنی ژیانی خەڵکی سڤیل و پەنابەران، پێشێلکردنێکی زەقی یاسا نێودەوڵەتییەکان و هەروەها کۆنڤانسیۆنی ژنێڤە. هاوپەیمانیی هێزە سیاسییەکانی کوردستانی ئێران داوا لە حکومەتی فیدراڵیی عێراق، ویلایەتە یەکگرتووەکانی ئەمریکا و ڕێکخراوی نەتەوەیەکگرتووەکان دەکات، تەنیا بە ئیدانەکردنی ئەو هێرش و دەستدرێژییانە نەوەستن و هەنگاوی کردەیی بۆ ڕاگرتنی ئەم پەلامارانە بنێن کە هەم بێڕێزی و پێشێلکردنی سەروەریی عێراق و هەرێمە و هەم بەهێندنەگرتنی یاسا نێودەوڵەتییەکانە.
ڕژێمی ئێران دەبێت بزانێت کە تیرۆر، تۆقاندن و درۆنباران، ناتوانێت ئیرادەی نەتەوەیەک بۆ بەدیهێنانی مافە ڕەواکانی سست بکات و ئەم هێرشانە یەکڕیزیی هێزە سیاسییەکان و جەماوەری کوردستان بۆ کۆتایهێنان بە ستەمکاری و داگیرکاری بەهێزتر دەکات.
هاوپەیمانیی هێزە سیاسییەکان وێڕای نوێکردنەوەی بەڵێن لەگەڵ شەهیدانی ڕێگای ڕزگاری ڕادەگەیەنێت کە هەتا ڕووخانی ڕژێمی کۆماری ئیسلامی و بەدیهێنانی مافە نەتەوایەتییەکانی گەلەکەمان، لە خەبات و تێکۆشان بەردەوام دەبێت.
