کوومەڵگەی ژنەیل ئازاد ڕووژهەڵات کوردستان-کەژار وەبڵاوکردن بەیانیەیگ پشتیوانی خوەی لە جمشت خوەندکارەیل ئێرانی ئعلام و تەکید کرد، زانستگەیل بینەسە ناوەند ئەسڵی بەرخوەدان و نماد دمۆکراسی مەردمی.
لە بەیانیەگەی کەژار هاتیە هێزەیل موحافزەکار حاکم ئەڕا پاراستن ساختار ئقتدارگرایی دەسەڵات دەسدانەسە سەرکوت وەرفراوان، سەرکوتێگ ک هەزاران کوشیاگ، دەیان هەزار زامدار و ژمارێگ فرە زندانی مەحکووم وە ئێعدام و موبارزەیلیگ وە چارەنویس نادیار وەجێ هیشت.
لە ئی بەیانیە تەکید کریاس، خوین گیان لەدەسدریاگەیل تەنیا لە ڕێ ئازادی و دمۆکراسی ڕشیاس و نسبەتدایێن سەرهەڵدان مەردمی وە گیچەڵەیل ئقتسادی، ڕەوایەتێگ دویر لە راسیە و لە لایەن ڕسانەیل گرێدریاگ وە ساختار ئقدارگرا و هوژمونیخواز ئەنجام گردیە.
کەژار ئاماژە کردیەسە گۆڕانکاری ساڵ ١٣٥٧ و وەتیە: ئەو جوورەیگە مەردم ئێران وە ڕەد نزام پاشایەتی پەهلەوی، ئاڵای ئازادی بەرزەو کردن،، ئمرووژیش وە هەمان ئەنگیزە لە وەرانوەر ئستبداد وسانە.
کەژار جەخت کردیە ئدعایەیل پەیوەندیدار وەگەرد گرایش سەڵتەنەتخوازی هویچ پشتیوانی کوومەڵایەتی نەیرید و لەبارەی دەرئەنجامەیل ئاڵترناتیڤ داسەپیاگ و خارجی هوشداری دریاس.
کەژار جمشت ئیسەیی وە دڕێژەی فەلسەفەی ژن ژیان ئازادی وەسف کردیە و ژنەیل و جوانەیل لەوای هێز دیاریکەر ئی حەرەکەتە ناو بردیە و تەکید کردیە،، زانستگەیل بینەسە ناوەندەیل ئەسڵی بەرخوەدان و نماد دموکراسی مەردمی.
کوومەڵگەی ژنەیل ئازاد ڕووژهەڵات کوردستان لە ئاخر بەیانیەگەی خوازیار بەردەوامی ناڕەزایەتیەیل، یەکیەتی هێزەیل دمۆکراسیخواز و پارێزوانی لە خوەین گیان لەدەسدریاگەیل بی و پاڵپشتی خوەی لە گشت سەرهەڵدانەیل مەردمی لە سەر ئەساس ئازادی و بەرابەری ئعلام کرد.
