ڕێوار ئاودانان ئەندام شەورای ڕێوەبەری پژاک، لە نویسنێگ ک لە ماڵپەڕ تریبون زەمانە بڵاو بیە لە باوەت سەرهەلدان خوەندکارەیل و مەردوم ئاودانان تەکیید کردیە،زانستگەیل ئێران سەنگەر پارێزوانی لە ئازادی و دموکراسی لە وەرانوەر کونەپەرەستیە و خوەندکارەیل وە شوئارەیلیان خەتەر موسادرەی موبارزەی مەردوم پویچەڵەو کردن.
ڕێوار ئاودانان ئەندام شەورای ڕێوەبەری پارت ژیان ئازاد کوردستان پژاک، لە نویسنێگ ک لە ماڵپەڕ تریبون زەمانە بڵاو بیە لە باوەت سەرهەلدان خوەندکارەیل وەتیە: دروس وەختێگ ک سەرهەلدان سەرانسەری مەردوم جوغرافیای سیاسی ئێران وەگەرد خەتەر موسادرە لە لایەن لایەنەیل کوونەپەرەست ڕویوەرویە، جارێ ترەک خوەندکارەیل زانستگە وە موبارزەی دموکراتیک هاتنە مەیدان و ئاسوو ڕووشن ئەڕا ئدامەی موبارزەی مەردوم وە دێ هاوردن.
ئاودانان ئشارە کردیەسە شوئار خوەندکارەیل لەوانە “ژن ژیان ئازادی، مەرگ بەر ستەمگەر، نە سەڵتەنەت نە ڕەهبەری، ئازادی و بەرابەری” و تەکیید کردیە ک خوەندکارەیل وە شوئارەیلیان خەتەر موسادرەی موبارزەی مەردوم پویچەڵەو کردن و ئەی شوئارەیلە وە پێچەوانەی شوئارەیل نژادپەرەستانە و کویلایەتی سەڵتەنەت تەڵەبەیلە.
ڕێوار ئاودانان لە درێژە ڕووشنایی خستیەسە سەر پلان شووم سەڵتەنەت تەڵەبەیل و وەتیە: هەر چەن جەریان سەلتەنەت تەقەلا کرد موبارزەی دموکراتیک مەردوم وە لا ڕێ بوەی، بەڵام خوەندکارەیل جارێ ترەک نیشاندان، ک زانستگەیل ئێران سەنگەر پارێزوانی لە ئازادی و دموکراسی لە وەرانوەر کونەپەرەستیە.
ئەندام شەورای ڕێوەبەری پەژاک بەرخوەدان خوەندکارەیل بەرز نرخاند و وەتیە، خوندکارەیل نیشاندان، ئازادی خوەیان تەسلیم هویچ سەرکردەییگ لە خود ڕازی و ستەمکار نیەکەن و سابت کردن، ئەهڵ بەیعەت و نەوکەری نیەن.
ئاودانان ئشارە کردیەسە موبارزەی بێ وچان مەردوم و وەتیە سەرهەڵدان زانستگەیەیل ئاشکارترین مەدرەکە، ک کوشتار دەڕەندانەی هێزەیل سەرکوتگەر ڕژیم ئێران ناتوانێ کومەڵگە تەسلیم بکەید.
ڕێوار ئاودانان تەکیید لەوە کردیە، زانستگەیەیل وە هەڵوێست شووڕشگەرانەی خوەیان، سابت کردن ستون کرامەت و ئازادی کومەڵگەن و شایەستەی پشتیوانین.
ڕێوار ئاودانان ئەندام شەورای ڕێوەبەری پارت ژیان ئازاد کوردستان پژاک لە ئاخرا ڕووشنایی خستە سەر بەرخوەدان شووڕشگەرانەی ئاودانان و وەتیە، لە ڕوی مەیدانیەو سەرهەڵدان وەردەوام مەردوم بەرخۆدێر ئاودانان، توانێد مودڵێگ سەرکەفتێ بوود ئەڕآ ناوچەیل ترەک ئێران.
ئەو سەرهەڵدانەیلە ک داوای ئازادی زندانیەیل سیاسی کەید، سیمای سیاسیی بەخشێدە سەرهەڵدانەیل مەردومی و زەربەری وەردەوام دەید لە ڕژیم ئێران و ناچارێ کەید تەسلیم کوومەڵگە بود.
