چەنگيز چيچەک، نوێنەری پەرلەمانی پارتی يەکسانی و ديموكراسی گەلان (دەم پارتی)، لە چوپێکەوتنێکدا لەگەڵ ڕۆژنامەی يەنی ئۆزگور پۆليتيكا، جەختی لە پێويستی دروستكردنی چوارچێوەیەكی ياسایی بۆ پەڕينەوە لە قۆناغی شەڕی چەكداری بۆ قۆناغی سياسەتی ديموكراتی كردەوە. ئەو دەڵێت: «ئامانج، پەڕينەوەيە لە سەدەی ئينكار و سەرهەڵدان بۆ سەدەیەکە كە نە ئينكاری تێدا بێت و نە پێویست بە سەرهەڵدان بکات.»
چيچەک «مافەكانی پەڕينەوە»ی وەك بنەمايەكی ياسایی وەسف كرد كە بە وتەی ئەو، دەرفەتی گۆڕينی جوڵانەوەی ئازادی كورد لە ڕێكخراوێكی چەكدارەوە بۆ جوڵانەوەيەكی سياسی، كۆمەڵايەتی و ديموكراتی دەڕەخسێنێت. بە باوەڕی ئەو، كوردەكان لە دەرەوەی بازنەی ياسا ڕاگيراون و ئەم مافانە توانای ئەوەيان پێدەدات كە وەك هێزێكی ياسایی و ديموكراتی بچنە ناو مەیدانی سياسییەوە.
ئەو هەروەها باسی لە پێويستی پەسەندكردنی كۆمەڵێک ياسا بە ناوی «ئينتەگراسيۆنی ديموكراتی» كرد. ئەم ياسایانە بە وتەی ئەو دەبێت بەستێنی ژیانی هاوبەش و يەکسان لە نێوان كوردەكان و گەلانی ديكەدا بەهێز بكەن. چيچەک لە درێژەدا دەڵێت: ئەم ياسايانە دەبێت هەڵاواردنە مێژووييەكان لەناو ببەن و مافە كلتووری، زمانەوانی و سياسییەکانی گەلی كورد دەستەبەر بكەن.
ئەو جەختی كردەوە كە «ياسای بەرەنگاربوونەوەی هەڵاواردن» دەبێت يەكێك لە يەكەم هەنگاوەكان لەم پرۆسەيەدا بۆ ڕێگریکردن لە دووبارە بەرهەمهێنانەوەی نايەکسانیيەكانی نەتەوەيی، ئايينی و كلتووری بێت.
چيچەک بە ئاماژەدان بە ئەزموونە مێژووييەكان، پەسەندكردنی «ياسای قۆناغی پەڕينەوە»ی بۆ ئاسانكردنی پەڕينەوەی جوڵانەوەی ئازادی كورد بۆ بزووتنەوەیەکی سياسی ديموكراتی بە پێويست زانی و وتی ئەم ياسايە دەتوانێت جێگرەوەیەك بۆ ڕێبازەكان لەسەر بنەمای لێبوردن يان سەركوت بێت.
ئەو هەروەها داوای كۆبوونەوەی لێژنەی پەرلەمانی لەگەڵ عەبدوڵڵا ئۆجالان كرد و جەختی كردەوە كە گفتوگۆ لەگەڵ سەرۆكی زیندانیكراوی جوڵانەوەی كورد بۆ سەركەوتنی پرۆسەی ئاشتی گرنگە.
چيچەک لە كۆتايیدا وتی ئەگەر ئەم پرۆسەيە بە عەقڵانيەتی سياسی و ياسایی نوێ پێش بكەوێت، دەتوانێت توركيا لە سيستەمی ئينكارگەری سەدەی ڕابردووەوە بەرەوە «كۆماری ديموكراتی» لە سەدەی دووهەمدا ببات.
