دادگای ئنقلاب ڕژیم تێران لە ئوورمیە پەنج کەس لە دەسوەسەر کریایل شوورش “ژن،ژیان،ئازادی” لە بووکان وە تومەتەیل ئەمنیەتی وە دوانزە دەف ئعدام، حەبس و جەریمەی نەقدی مەحکووم کرد. ئێ حوکمەیلە لە سەر ئقرارەیل زووڕەمڵی و ئەشکەنجە دەرچیە.
وە گوزارش شەبەکەی ماف مڕووڤ کوردستان، شوبەی یەکم دادگای ئنقلاب ئسڵامی ئوورمیە وە ڕیاسەت رزای نەجەفزادە وموستەشاری ئسماعیل بەزرکاری، پەنج هاووڵاتی کورد وە ناوەیل پژمان سولتانی، عەلی (سووران) قاسمی، کاوە سالحی، ڕزگار بەیگ زادەی بابامیری و تەیفوور سەلیمی بابامیری وەئتهامەیل “بەغی ،موحاربە و درس کردن گرووە موجرم باغی” وە دوانزە دەف ئعدام مەحکووم کرد.
ئێ کەسەیلە هاوکات وە تومەت “هاوکاری گەرد ئسرائیل” ،”قاچاخ ۱۲۰ دەسگای ئستارلینک” و “تەبلیغ وە پێچەوانەی نزام” وە پەنج تا پانزە ساڵ زندان و تاوان نەقدی مەحکووم کردیانە.
ئێ حوکمەیلە دۊیای سێ جەلەسە دادگای ئانلاین دەرچیە و ڕووژ ۱۶ تیر ۱٤۰٤ وە پاڕێزەرەیلیان ڕاگەیندریاس.
توور ماف مڕووڤ کوردستان ڕاگەیاندیە کە سەنەدەیل پەروەندە تەنیا لە سەر گوزارشەیل ئدارەی ئتلاعات و ئعتراف ئجباری ژیر ئەشکەنجە تەنزیم کریاس و هیچ مەدرەکی سەروەخو لە سەریان نەیوە.
ئی ۱٤ هاووڵاتیە لە وەهار ساڵ ۱٤۰۲ وە هەوەجەی بەشداری لە ئعترازەیل بووکان و بانە دەسوەسەر کریانە و چەندین مانگ ژیر ئەشەنجە و بێ پارێزەر و موڵاقات بێنە.
