کوردستان

ئەمڕۆ ساڵڕۆژی تیرۆرکردنی ڕۆژنامەنووس سەردەشت عوسمانە

ئەمڕۆ دوازدە ساڵ بەسەر تیرۆری سەردەشت عوسمان دا تێپەڕدەبێت، کە بوو بە سمبولی ئازادیی نووسین و ڕادەربڕین لە باشوری کوردستان.

سەردەشت عوسمان لە دایكبووی ساڵی ١٩٨٨ لە شاری هەولێرە. ئەو كاتەی تەمەنی ٢٢ ساڵان بوو لە كۆلێژی ئەدەبیاتی سەر بە زانكۆی سەڵاحەدینی هەولێر بوو. بەشی ئینگلیزی لە قۆناغی كۆتایی و ساڵی چوارەمی خوێندنی دا بوو.

بەرەبەیانی چواری مەی٢٠١٠ە، چەند چەكدارێک لە بەردەم کۆلێژەکەی دا دەیڕفێنن و لە ڕۆژی پێنجی مەی، تەرمەكەی لە شاری موسڵ دۆزرایەوە.

دوای ڕووداوەکە، یەک لە ئەندامانی بنەماڵەکەی ڕایگەیاند، بە هۆی ئەوەی فیشەک لەناو دەمی سەردەشت دراوە، ئاماژەیەکە بۆ ئەوەی لەسەر قسەكردن و نوسینەكانی تیرۆر کراوە.

سەردەشتی ڕۆژنامەنووس بەر لە تیرۆرکردنی هەڕەشەی کوشتنی لێدەکرێت، لە دوایین نووسینیدا دەڵێت، له ‌چه‌ند ڕۆژی ڕابردوودا بۆ یه‌كه‌مین جار پێیان گوتم، كه ‌ته‌مه‌نت زۆری نه‌ماوه‌، به ‌وته‌ی خۆیان مۆڵه‌تی هه‌ناسه‌دانم له‌م شاره‌دا نه‌ماوه، به‌ڵام نه ‌باكم بە مردنه ‌و نه ‌ئازاردان، له‌چاوه‌ڕوانیی كۆتایی هاتنی مۆڵه‌ته‌كه‌مدام، تا بە دیداری بكوژه‌كانی خۆم بگه‌م، دوعا ده‌كه‌م مردنێكی تراژیدیم پێببه‌خشن، كه ‌شایسته‌ی ژیانه‌ تراژیدیەكه‌م بێت.

تیرۆری سەردەشت عوسمان كاردانەوەی ناوخۆی و جیهانیی لێكەوتەوە، دەسەڵاتەکەی پەدەکە ناچاربوو بە دانانی سیناریۆی پێکهێنانی لیژنە، ئەنجامی لێکۆڵینەوەی ئەو لیژنەیە، کە تیایدا سەردەشتیان وەک تیرۆرست و ئەندامی گروپی ئیسلامییە توندڕەوەکان ناساند، کە لەلایەن رۆژنامەنوسان، رێکخراوەکانی مافی مرۆڤ، چاودێرانی نێودەوڵەتی، بنەماڵەی سەردەشت و خەڵکی کوردستانەوە ڕەدکرایەوە.

ئەم ساڵیش بۆ یادی دوازدە ساڵەی تیرۆری ڕۆژنامەنوس سەردەشت عوسمان لە زۆربەی شارەکانی هەرێمی کوردستان و دەرەوەی ووڵات مەراسیمی جیاواز بەڕێوەدەچن.

ئه‌مانه‌ش ببینه‌