ژن

لە شارۆچکەی کفری ژنێک خۆی سووتاند و گیانی لەدەستدا

بەرەبەیانی ئەمڕۆ، تەرمی ژنێک بەناوی (ل.ف)، لەدایکبووی ساڵی ۱۹٦٨ و دانیشتووی شارۆچکەی کفری سەر بەئیدارەی گەرمیان، گەیەندرایە نەخۆشخانەی فریاکەوتنی شەهید هەژار لە کەلار.

بەپێی ئەو زانیارییانەی ڕزگار لەتیف، جێگیری بەڕێوەبەری نەخۆشخانەکە بە ڕۆژنیوزی داوە، جەستەی ژنەکە بەتەواوەتیی سووتاوە و ئەوانیش دەستبەجێ تەرمەکەیان ڕەوانەی پزیشکی دادوەریی کەلار کردوە.

ڕزگار لەتیف، وتیشی: کوڕێکی ژنەکە، لەکاتی هەوڵدان بۆ کوژانەوەی ئاگرەکە، بەشێکی جەستەی سووتاوە و دوای چارەسەری سەرەتایی، ڕەوانەی نەخۆشخانەی فریاکەوتنی سلێمانی کراوە.

دەربارەی وردەکاریی ڕووداوەکە، ئەیوب حسێن، وتەبێژی بەڕێوەبەرایەتی بەرەنگاربوونەوەی توندوتیژیی دژ بە ژنان لە گەرمیان ڕایگەیاند: تیمەکانمان چونەتە شوێنی ڕووداوەکە و هێڵکارییان بۆکردوه، بەپێی لێکوڵینەوە سەرەتاییەکان، ژنەکە خۆی ئاگری لەجەستەی خۆی بەرداوە.

وتیشی: لێکۆڵینەوەکان بەردەوامن، بەڵام لەبەر ڕێڕەوی لێکوڵینەوەکان، زانیاریی زیاتر ئاشکرا ناکەین.

Mesajên peywendîdar